Klukkan hálf tvö í nótt hugðust lögreglumenn stöðva akstur ökumanns í Árbæ. Hann var ekki á þeim buxunum að fara eftir fyrirmælum lögreglunnar og reyndi að komast undan. Þegar hann ók inn á afrein valt bifreiðin. Tvennt var í bifreiðinni og voru þau flutt til aðhlynningar á bráðadeild og að því loknu handtekin og flutt í fangageymslu. Þau eru grunuð um akstur undir áhrifum fíkniefna.
Bifreiðin skemmdist mikið og var flutt á brott með dráttarbifreið. Lausamöl og hálkublettir voru á vettvangi.
