Óróapúls mælist nú á jarðskjálftamælum Veðurstofunnar í námunda við fjallið Keili. Slíkir púlsar mælast iðulega í aðdraganda eldgosa, en þó er tekið fram að ekki sé staðfest að eldgos sé hafið.
Tilkynning Veðurstofunnar í heild sinni má sjá hér:
Óróapúls hófst kl. 14:20 og mælist á flestum jarðskjálftamælum og er staðsettur suður af Keili við Litla Hrút. Slík merki mælast í aðdraganda eldgosa en ekki hefur verið staðfest að eldgos sé hafið. Unnið er að nánari greiningu.Von er á meiri upplýsingum á næstu mínútum.
Vefmyndavél sem Víkurfréttir kom upp af fjallinu Keili hefur vakið mikla athygli síðustu daga og ljóst að fyrstu viðbrögð margra hafi einmitt verið að kíkja inn á síðu Víkurfrétta, því hún liggur niðri í augnablikinu.
Í samtali við mbl.is segir Víðir Reynisson að gosórói af þessu tagi bendi til þess að það stefni í gos. Hann segir jafnframt að verið sé að virkja almannavarnakerfin og undirbúa aðgerðir. Þá sagði Víðir að verið er að rýma svæðið af starfsfólki Veðurstofunnar og almannavarna sem er á svæðinu í vettvangsvinnu. Hann hvetur almenning til þess að fara alls ekki á svæðið þar sem viðbragðsaðilar þurfi vinnufrið á svæðinu.
Miðað við viðbragðsáætlun sé líklegt að Keflavíkurvegi verði lokað komi til eldgoss, segir mbl.is, en miðað við staðsetningu á óróapúlsinum eins og hann mælist nú sé ólíklegt að sú lokun muni standa í langan tíma.
Boðað hefur verið til blaðamannafundar klukkan 16:00 með fulltrúum Veðurstofu og almannavarna.