Á tólfta tímanum hafði lögreglan afskipti af manni í miðborginni en sá er grunaður um gripdeild. Nánar tiltekið er hann grunaður um að hafa tekið tösku af konu og hlaupið á brott með hana. Hann sagðist hafa kastað töskunni frá sér og fundust skilríki úr töskunni þar sem hann sagðist hafa kastað henni frá sér. Taskan sjálf og aðrir munir úr henni fundust hins vegar ekki.
Um klukkan eitt í nótt var 17 ára ökumaður handtekinn í Árbæ en hann er grunaður um að hafa verið undir áhrifum fíkniefna. Málið var afgreitt með hefðbundinni sýnatöku og tilkynningu til foreldra og barnaverndaryfirvalda.
Þrír ökumenn til viðbótar voru handteknir í gærkvöldi og nótt, grunaðir um að vera undir áhrifum áfengis og/eða fíkniefna.
Skráningarnúmer voru klippt af um 20 bifreiðum í Breiðholti og Kópavogi í gærkvöldi og nótt þar sem þær höfðu ekki verið færðar til skoðunar og/eða voru ótryggðar.