Samkvæmt frétt RÚV í kvöld er lögregla að fá skýrari mynd á Rauðagerðismorðið og miklar líkur eru taldar á því að málið leysist. Um tuttugu manns vinna eingöngu við rannsóknina.

Gæsluvarðhald þriggja manna rennur út á morgun en lögregla ætlar að krefjast framlengingar á gæsluvarðhaldi eins þeirra.

Níu manns eru í haldi lögreglu vegna málsins og hafa þeir verið yfirheyrðir undanfarna daga, mismikið hver og einn.

Lögregla hefur lagt hald á tölvugögn, bæði tölvur og snjallsíma. Að sögn Margeirs Sveinssonar, yfirlögregluþjóns sem stýrir rannsókninni, er sú vinna að yfirfara þessi gögn afar tímafrek en meðal annars er unnið að því að kortleggja ferðir manna.

Samkvæmt Fréttablaðinu telur lögregla sig vita hvaða gerð af byssu var notuð við morðið en ekki er staðfest að lagt hafi verið hald á morðvopnið. Auk tölvutengdu munanna sem nefndir voru hér að ofan hefur lögregla lagt hald á vopn og bíla eftir umfangsmiklar húsleitir.

Verið er að rannsaka hvort málið tengist uppgjöri skipulagðra glæpahópa eða hvort um hafi verið að ræða uppgjör milli tveggja manna. Lögregla telur sig hafa morðingann í haldi en sá sem helst hefur legið undir grun neitar sök.