Framkvæmdastjóri einkahlutafélagsins Himins sólar ehf. sem rekur veitingastaðinn B&S Restaurant á Blönduósi hefur verið ákærður fyrir að ráða fólk til starfa án atvinnuleyfis. Jafnframt eru þrjár manneskjur ákærðar fyrir að hafa ráðið sig á B&S Restaurant og starfað þar um skeið í fyrra án atvinnuleyfa.
Málið verður tekið fyrir í Héraðsdómi Norðurlands vestra á Sauðárkróki 3. febrúar á næsta ári.
Ákærur í málinu eru birtar í Lögbirtingablaðinu í dag þar sem ekki hefur tekist að birta öllum ákærðu ákærur. Um er að ræða, auk framkvæmdastjórans, konu frá Venesúela, karlmann frá Serbíu og annan karlmann frá Svartfjallalandi. Fólkið allt, auk framkvæmdastjóra félagsins sem rekur B&S Restaurant, eru ákærð fyrir brot á lögum um atvinnuréttindi útlendinga, nánar tiltekið 2. mgr. 6. gr., sbr. a. lið 1. mgr. og a. lið 2. mgr. 27. gr. Lagaákvæðin eru eftirfarandi:
„Atvinnurekanda er óheimilt að ráða útlending til starfa, hvort heldur er um langan tíma eða skamman, sbr. þó 4. og 5. mgr. 19. gr., eða hlutast til um að útlendingur flytjist til landsins í því skyni án atvinnuleyfis enda sé hann ekki undanþeginn kröfu um atvinnuleyfi samkvæmt lögum þessum.“
„Útlendingi er óheimilt að ráða sig til starfa hér á landi nema leyfi hafi verið veitt samkvæmt lögum þessum“
Þess er krafist að fólkið verði dæmt til refsingar og greiðslu alls sakarkostnaðar.
B&S Restaurant er allþekktur veitingastaður meðal ferðamanna, jafnt innlendra sem erlendra. Hefur staðnum meðal annars verið hrósað fyrir góða hamborgarasósu, gott andrúmsloft og fína þjónustu.
