Skömmu fyrir klukkan 22 í gærkvöldi hafði lögreglan afskipti af tveimur ungum mönnum við skóla í Hafnarfirði. Annar þeirra er grunaður um líkamsárás og hinn um tálmun opinbers starfsmanns. Árásarþolinn var með áverka í andliti eftir högg og ætlaði sjálfur að leita á heilbrigðisstofnun.  Hinn meinti árásarmaður veitti lögreglumönnum áverka þegar hann var handtekinn.

Tilkynnt var um nokkur umferðaróhöpp í öllum hverfum borgarinnar í gærkvöldi og nótt en þau má rekja til mikillar hálku og snjókomu. Aðallega var um eignatjón að ræða en þó voru dæmi um minniháttar meiðsl.

Á tíunda tímanum í gærkvöldi var tilkynnt um líkamsárás við veitingahús í Laugardalshverfi en þar réðust tvær konur á mann og veittu honum áverka.

Á öðrum tímanum í nótt höfðu lögreglumenn afskipti af manni á rafmagnshlaupahjóli í Kópavogi. Maðurinn er grunaður um hylmingu og var hald lagt á hlaupahjólið.

Einn ökumaður var handtekinn í nótt grunaður um að vera undir áhrifum fíkniefna.