Óprúttnir aðilar eru sagðir hringja í grandalaust fólk, í nafni OR, og sakað það um stuld á rafmagni. OR vill koma því á framfæri að þessi símtöl eru ekki í nafni samstæðunnar. Breki Logason, samskiptastjóri OR, sendi eftirfarandi tilkynningu á fjölmiðla vegna málsins:

„Svo virðist sem óprúttnir aðilar séu að hringja í fólk í nafni fyrirtækja í Orkuveitu-samstæðunni og saka það um að hafa stolið rafmagni. Við höfum fylgst með umræðu um þetta mál á samfélagsmiðlum og fólk hefur líka hringt í okkur vegna þessa. Tilgangurinn virðist vera sá einn að gera at í fólki því ekki er beðið um persónuupplýsingar, kortanúmer eða slíkt. Hringt er úr símanúmeri sem byrjar á 877 og áréttað er að símtölin eru ekki á vegum Orkuveitu Reykjavíkur eða dótturfyrirtækja.“