Úrskurðurinn þykir óvenjulegur fyrir margar sakir, en þrátt fyrir stjórnskrárbundna meginreglu um að þinghald skuli háð í heyrandi hljóði hafa kynferðisbrotamál verið tekin í heilu lagi út fyrir þann sviga. Ýmsar réttlætingar eru gefnar fyrir þeirri undanþágu í lögum, til að mynda að hlífa aðilum máls, fjölskyldum þeirra og vandamönnum frá því að alþjóð geti fylgst með vitnisburði og umfjöllun um viðkvæm brot.
Var það brotaþoli í málinu sem krafðist þess að þinghald yrði opið. Úrskurði héraðsdóms hefur, samkvæmt heimildum DV, þegar verið áfrýjað til Landsréttar.
Dómarinn í málinu er Ingi Tryggvason, sem var einnig formaður kjörstjórnar í Norðvesturkjördæmi í nýafstöðnum þingkosningum.
Jóhannes Tryggvi var í byrjun árs dæmdur í fimm ára fangelsi fyrir fjórar nauðganir, sem allar voru framdar á meðferðarstofu þar sem hann starfaði. Jóhannes áfrýjaði dómnum og er það mál til meðferðar hjá Landsrétti en aðalmeðferð lauk í málinu í gær.
Á fjórða tug kvenna kærðu Jóhannes til lögreglu vegna meintra brota sem teygja sig rúmlega áratug aftur í tímann, en að endingu var aðeins ákært í málum fjögurra kvenna. Brotaþoli í málinu sem nú er til meðferðar hjá Héraðsdómi Reykjaness kærði niðurfellingu á rannsókn lögreglu á kæru sinni til Ríkissaksóknara sem felldi ákvörðun lögreglunnar úr gildi.
Brotin sem um ræðir í því máli voru framin áður en dómurinn fyrir nauðganirnar fjórar féll í janúar. Þar sem ákæran í þessu seinna máli var gefin út eftir að dómur féll í því fyrra er sú fáheyrða staða nú uppi að saksóknarar reka nú mál gegn Jóhannesi í bæði Héraðsdómi og Landsrétti á sama tíma vegna samskonar brota sem framin voru fyrir nokkru síðan.
Búast er við úrskurði Landsréttar um hvort ákvörðun um opið þinghald standi á næstu dögum. Þá er dóms Landsréttar vegna áfrýjunar Jóhannesar á fimm ára fangelsisdómi að vænta á næstu vikum.