Þann 30. september tilkynntu eigendur ferðaþjónustufyrirtækisins Mountaineers of Iceland um rán á tveimur snjósleðum í eigu fyrirtækisins. Átti ránið sér stað í Skútuvogi þá um nóttina.
Tilkynningu um málið var deilt í hinum öfluga Facebook-hópi „Hjóladót, tapað, fundið eða stolið“ sem Bjartmar Leósson stýrir. Tilkynningar um málið fóru í mikla deilingu á Facebook.
Þann 4. október var birt mynd af hvítum sendibíl en grunur lék á því að eigandi bílsins væri viðriðinn ránið. Eigandi Mountaineers of Iceland benti á að ránið væri mikið högg fyrir lítið fjölskyldufyrirtæki sem er að reyna að koma undir sig fótunum eftir Covid-faraldurinn og tjónið væri ótryggt með öllu.
Umræddur sendibíll var notaður í vélsleðaráninu og eftir mikla deilingar fannst bíllinn, þann 5. október, og var eigandi hans tekinn í yfirheyrslu hjá lögreglu. Í gær, þann 6. október, var endanlega upplýst um að snjósleðarnir væru fundnir og eru þeir nú komnir í hendur eigenda sinna, sem eru FB-hópnum var þakklátir.
Bjartmar Leósson sendi eftirfarandi tilkynningu á sitt fólk:
„Nokkur orð um snjósleðana og sendibílinn: Það eina sem ég gerði var að biðja ykkur um að deila mynd af bíl. Það endaði í 1900 deilingum. Það eru því þið sem eruð snillingarnir í þessu dæmi.“