Nefnd um eftirlit með lögreglu sendi í síðustu viku bréf til lögreglu þar sem hún brýndi fyrir lögreglu mikilvægi þess að hugað sé að klæðaburði sakborninga sem færðir eru til skýrslutöku eða fyrir dómara.
Þetta er, samkvæmt nefndinni, eitt atriða sem kemur í veg fyrir að meðferð sakborninganna teljist vanvirðandi. „Þannig er nauðsynlegt að hafa einfaldan fatnað til staðar á lögreglustöð eða leita aðstoðar fjölskyldumeðlima til að útvega fatnað, ef þörf krefur þar sem í engu tilviki á sakborningur að sæta því að sitja í skýrslutöku eða vera færður fyrir dóm án þess að vera klæddur með fullnægjandi hætti,“ segir í orðsendingu nefndarinnar til lögreglunnar.
Nefndin taldi ekki ástæðu til að frekari eftirfylgni af hálfu nefndarinnar en að beina þessum tilmælum til lögreglunnar, en tilkynnti þó málið til Opcat eftirlits umboðsmanns Alþingis. Opcat eftirlitið er valfrjáls bókun við samning Sameinuðu þjóðanna gegn pyndingum og annarri grimmilegri, ómannlegri eða vanvirðandi meðferð eða refsingu, að því er segir á heimasíðu UA. Umboðsmaður Alþingis fer með eftirlitið hér á landi.
Tilefni skoðunar nefndarinnar er kvörtun Hjalta Úrsus Árnasonar yfir meðferð lögreglunnar á syni hans, Árna Gils Hjaltasonar, er Árni var í haldi vegna rannsóknar lögreglu á meintri árás Árna.
Árni var dæmdur fyrir málið í héraði en sú sakfelling ómerkt og málið sent aftur í hérað af Hæstarétti til efnislegrar meðferðar. Aftur fékk Árni fjögurra ára fangelsi í héraði en var svo loks sýknaður í Landsrétti í mars á þessu ári. Lauk þar með fimm ára meðferð ákæruvaldsins á máli Árna.
Í svari lögreglunnar við erindi Nefndar um eftirlit með lögreglu og erindi föður Árna, Hjalta Úrsus, segir að kvörtun Hjalta hafi verið borin undir lögreglumanninn sem sagði það al rangt að hann hafi verið í nærfötunum einum klæða, hann hafi verið í náttslopp líka. Segir í svarinu:
Þegar upptaka af yfirheyrslunni var skoðuð kom í ljós að Árni Gils er íklæddur slopp auk þess sem hann hefur yfir sér teppi í upphafi yfirheyrslunnar. Hann er því alls ekki á nærfötum einum fata eins og haldið er fram og trúlega er hann leiddur fyrir dómara þannig tilhafður, það er að hann er í slopp en ekki á nærfötunum.
Nefnd um eftirlit með lögreglu, sem fyrr sagði, taldi náttslopp þó ekki ásættanlegan klæðnað.
