Haukur Örn Birgisson, lögmaður, segir í Bakþönkum Fréttablaðsins að allir Íslendingar séu sekir um að brjóta sóttvarnarreglur, mörgum sinnum á dag, en engu að síður leyfi fólk sér að setja sig á þann háa hest að fordæma aðra fyrir sambærileg brot.
„Við finnum stöðugt nýjar leiðir til að hefja okkur upp í þeirri viðleitni að gera okkur að betri manneskjum en við vorum í gær,“ skrifar Haukur. Hann bendir á að um áramót sé vinsælt að láta af ósiðum og leggjast í sjálfslagfæringu.
„Sjálfur tek ég þátt í þessum sirkus og hef af þeim sökum strengt mörg heimskuleg áramótaheit í gegnum tíðina. Að byrja að drekka rauðvín og kaffi, eftir að ég komst á fertugsaldurinn, var samt líklegast með þeim betri.“
Það sé þó betri leið til sjálfsupphafningar að beina athyglinni frá eigin göllum og benda þess í stað á mistök annarra.
„Mörgum viðist líða betur með sjálfa sig þegar aðrir klúðra hlutunum og ársins 2020 má minnast fyrir fjölda slíkra uppákoma.“
Vísar Haukur þar til atvika sem áttu sér stað fyrir áramót, meðal annars listsýningin í Ásmundarsal sem Bjarni Benediktsson fjármálaráðherra fór á, fjölmenn messa í Landakotskirkju, sóttvarnarbrot ensku landsliðsmannanna, og golferð Þorgerðar Katrínar Gunnarsdóttir, þingmanns.
„Sóttvarnareglur, sem við fæst fáum botn í, eru frábært dæmi um þetta. Öll brjótum við þessar reglur mörgum sinnum á dag en það stöðvar okkur samt ekki í því að klaga hvert annað og jafnvel tilkynna til lögreglu þegar aðrir stíga sín feilspor.
Full vandlætingar bendum við og hrópum á ráðherrann sem fór í veislu, þingmanninn sem fór í golf, stúlkurnar sem hittu ensku fótboltadrengina og kaþólsku kirkjugestina sem varð á í messunni, bókstaflega. Þau skulu smánuð fyrir að vera ekki fullkomin eins og við hin. Þeim er hollara að biðjast afsökunar.“
