Héraðssaksóknari hefur ákært mann fyrir kynferðisbrot gegn barni annars vegar og brot gegn barnaverndarlögum með því að senda barninu sem honum hafði verið trúað fyrir til kennslu ósiðleg skilaboð á samfélagsmiðlinum Facebook.
Segir í ákærunni að brotin hafi staðið yfir frá því í nóvember 2017 og fram til 11. maí 2018. Ákæran er í tveimur liðum og segir í fyrri lið hennar að hann sé sakaður um að hafa brotið kynferðislega gegn stelpunni með því að hafa ítrekað áreitt hana kynferðislega, með kynferðislegum ummælum og kynferðislegu myndefni og þannig sært blygðunarsemi hennar og sýnt henni ósiðlegt athæfi.
Þá er maðurinn í seinni lið ákærunnar sagður hafa brotið barnaverndarlög með því að hafa ítrekað sent stelpunni skilaboð með „ummælum, táknum og myndefni þar sem hæðst er að jaðarsettum hópum, s.s. á grundvelli fötlunar, þjóðernis, litarháttar, kynþáttar, trúarbragða og kynhneigðar“ og þannig sýnt henni ruddalegt og ósiðlegt athæfi.
Málið verður þingfest í Héraðsdómi Norðurlands eystra næstkomandi miðvikudag, 6. janúar.