Fjögur innanlandssmit af Covid-19 greindust í gær, þar af voru tveir í sóttkví. Aðeins tvö landamærasmit greindust sem eru ánægjuleg tíðindi eftir mörg landamærasmit undanfarið.
Um 600 sýni voru tekin innanlands í gær. Þrír liggja á Landspítalanum með virkt smit og 15 með óvirkt smit. Enginn er á gjörgæslu.
Í máli Þórólfs Guðnasonar sóttvarnalæknis á upplýsingafundi dagsins kom fram að ekki mætti búast við frekari afléttingum á takmörkunum á næstunni. Það væri ánægjulegt hvað fá smit væru að greinast en enn væru að greinast innanlandssmit utan sóttkvíar sem sýndi að veiran væri enn virk í samfélaginu. Aðeins ein vika væri síðan síðustu afléttingar tóku gildi en nýjasta reglugerð gildir til 17. febrúar. Árangur af aðgerðum komi vanalega ekki í ljós fyrr en einum til tveimur vikum síðar.
Uppfærð dreifingaráætlun frá bóluefnaframleiðandanun Pfizer liggur fyrir og verða komnir 50.000 skammtar af bóluefni í lok mars. Dreifingaráætlun eftir það liggur ekki fyrir.
5.000 sjúklingar á dvalarheimilum og framlínustarfsfólk fengu aðra bólusetningu sína í þessari viku og á næstunni fá 3.000 einstaklingar í elsta aldurshópi sína fyrstu bólusetningu.