Donald Trump, fráfarandi Bandaríkjaforseti, hefur undanfarið verið duglegur þegar kemur að því að náða fólk. Síðustu stóru nöfnin sem hann hefur náðað eru menn eins og Steve Bannon, sem grunaður var um að kúga fólk í sambandi við fjáröflun fyrir landamæravegginn hans Trump, og rapparinn vinsæli Lil Wayne. Þá náðaði Trump líka annan vinsælan rappara að nafni Kodak Black.
Samtals hefur Trump náðað alls 73 einstaklinga að undanförnu. En hver er ástæðan fyrir því að Trump er að náða þessa menn sem um ræðir og annað fólk á þessum lokatímum sínum í embættinu? Þessari spurningu velta eflaust margir fyrir sér þessa stundina. Heimildarmaður CNN er mögulega með svarið við þessu. Þar kemur fram að Trump hafi átt erfitt með að einbeita sér að þessum efnum frá því að mótmælin þann 6. janúar síðastliðinn áttu sér stað.
„Þú gast ekki fengið forsetann til að einbeita sér að þessu,“ sagði heimildarmaðurinn. „Þessa helgina hafði hann ekki Twitter, hann var ekki með allar þessar truflanir,“ bætti heimildarmaðurinn svo við og það virðist vera sem Twitter hafi haldið forsetanum frá því að vinna í þessum málum.
Heimildarmaðurinn segir að Trump hafi verið minntur á að vald hans til að náða fólk sé líklega með því síðasta sem hann getur gert. Þá sagði heimildarmaðurinn að Trump fyndi til með fólki sem fékk hærri dóm en aðrir einstaklingar sem ákváðu að vera samvinnuþýðir lögreglunni. „Ég held að hann sé ekki ánægður þegar fólk lendir í veseni bara því það fer fyrir dóm,“ sagði heimildarmaðurinn.