Kaupfélag Skagfirðinga á Sauðárkróki hefur sent frá sér fréttatilkynningu þar sem fram kemur að fyrirtækið ætli að halda áfram að veita þeim matvælaaðstoð sem hafa lent í erfiðleikum vegna atvinnumissis í kórónaveirufaraldrinum.
Fyrir jólin gaf kaupfélagið um 90 þúsund máltíðir og aðstoð við þessar mörgu fjölskyldur verður framlengd fyrir páskana, eins og kemur fram í tilkynningunni:
„Kaupfélag Skagfirðinga hefur ákveðið að framlengja fram yfir páska matvælaaðstoð sína við þá sem eiga í erfiðleikum vegna atvinnumissis af völdum COVID-19 faraldursins eða fjárhagsvanda af öðrum ástæðum. Matargjafir félagsins fyrir jólin, alls um 90 þúsund máltíðir sem dreift var með milligöngu hjálparstofnana, komu sér víða vel en vandinn er enn til staðar. KS hefur þess vegna tekið ákvörðun um að halda áfram á sömu braut í samstarfi við Fjölskylduhjálp Íslands, Hjálparstofnun kirkjunnar, Mæðrastyrksnefnd Kópavogs, Mæðrastyrksnefnd Reykjavíkur og aðra staðbundna aðila.
Fyrirkomulag varðandi dreifingu matvælanna verður með sama hætti og fyrr. Framangreindar hjálparstofnanir annast úthlutun og hver máltíð verður sem fyrr samsett af íslenskum matvælum sem einkum eiga uppruna sinn í framleiðslu kaupfélagsins og dótturfélaga þess.“