Fréttablaðið ræðir í dag við þrjár konur sem stíga fram undir nafni og saka Jón Baldvin Hannibalsson, fyrrverandi ráðherra, um kynferðislega áreitni. Sögurnar hafa að einhverju leyti komið fram áður en konurnar afhjúpa nú nöfn sín til að svara fullyrðingum Jóns Baldvins um að frásagnir þeirra séu uppspuni.
Ein þeirra er Ragna Björg Björnsdóttir sem starfaði í Ráðherrabústaðnum árið 1996 og sakar Jón Baldvin um ósæmilega hegðun kvöld eitt er hann hafi verið gestkomandi þar. Í viðtalinu sakar hún Jón Baldvin annars vegar um skemmdarverk í bústaðnum og hins vegar um grófa áreitni gegn sér.
Segir hún marga valdamenn hafa látið eins og vitleysinga er þeir voru drukknir í bústaðnum. Kvöldið sem Jón Baldvin á að hafa sýnt af sér meint ósæmilegt athæfi var hún að vinna í eldhúsi bústaðarins fram á nótt. Hún hafi þá heyrt gífurlegan hávaða er hún var að ganga frá í eldhúsinu:
„Ég man að við vorum með átján þúsund króna koníaksglös sem lágu þarna á gólfinu brotin. Ef þetta hefði verið einhver Jón úti í bæ þá hefði maðurinn verið kærður fyrir
skemmdarverk,“ segir Ragna í viðtali við Fréttablaðið. Segir hún að Jón Baldvin hafi verið þarna að verki. Síðan segir hún:
„Þarna var hann að brjóta allt og bramla, þessi heldri maður. Allt í einu þeysist hann inn í eldhús og galar: Mig vantar kvenmann! Hann rýkur á mig, kemur aftan að
mér, grípur utan um mig og klípur í brjóstin á mér. Ég gat ekkert losnað frá honum.“
Frásögn Rögnu hefur áður birst nafnlaust. Yfirmaður Rögnu, Elías Einarsson, undirritaði yfirlýsingu þar sem sagði að frásögnin gæti ekki staðist þar sem Jón Baldvin hefði ekki verið skráður sem veislugestur á þessum tíma. Ragna segir skráningu gesta hafa verið áfátt.