Héraðsdómur Austurlands dæmdi á þriðjudaginn konu í fjögurra mánaða skilorðsbundið fangelsi fyrir röð alvarlegra hótana í garð annarrar konu. Er konan meðal annars sakfelld fyrir að hóta því að skaða ungt barn hennar.

Segir í dómnum að skilaboðin, sem sjá má hér að neðan, voru til þess fallin að konan óttaðist um líf, heilbrigði og velferð hennar og fjölskyldu sinnar.

„Ég hef engu að tapa“

„Ég hef misst allt“

„Það gerir mig hættulega“

„Já, þetta er hótun“

„Ég kem heim til ykkar og ég kæfi barnið þitt“

„Mér er skítsama“

„Ég væri að gera því greiða“

Lögreglan á Austurlandi sótti málið og krafðist þess að konunni yrði gert að sæta refsingu og greiðslu alls sakarkostnaðar, sem reyndar var enginn. Ákærða mætti hvorki við þingfestingu málsins né við aðalmeðferð þess og var því málið dómtekið að henni fjarstaddri og fjarvist hennar jafnað til játningar.

Þá segir í dómnum að ákærða hafi áður hlotið dóma fyrir umferðarlagabrot, fyrir að hafa ítrekað ekið undir áhrifum fíkniefna og/eða svipt ökuréttindum og fyrir fíkniefnalagabrot. Hlaut konan 60 daga fangelsi, skilorðsbundið til tveggja ára fyrir þessa glæpi. Hótanirnar áttu sér stað áður en sá dómur féll og var því ekki brot á skilorði þess dóms og dæmdi dómarinn því upp fyrri refsingu, eins og sagt er.

Niðurstaða dómarans var fjögurra mánaða skilorðsbundið fangelsi til tveggja ára.