Guðmundur Felix Grétarsson sem gekkst undir tvöfalda ágræðslu handleggja við axlir á miðvikudag er vaknaður eftir svæfinguna. Þetta er fyrsta aðgerð sinnar tegundar í heiminum.
Sylwia Gretarsson Nowakowska, eiginkona Guðmundar Felix, talaði við hann í morgun en hún fær ekki að hitta hann um ókominn tíma vegna COVID-19. „Hann er vaknaður, við vorum að tala saman í símanum og hann virðist hafa það ágætt. Hann er auðvitað búinn að fá mikið af verkjalyfjum en hann er nokkuð kátur,“ segir Sylwia í samtali við DV.
Guðmundur Felix lenti í lífshættulegu slysi þann 12. janúar 1998 þar sem hann missti báða handleggina og það 23 árum seinna, nánast upp á dag, sem hann fékk nýju handleggina. Hann flutti til Lyon í Frakklandi, þar sem aðgerðin var gerð, árið 2013 og hefur verið á biðlista eftir handleggjum í fimm ár. Aðgerðin þykir mikið þrekvirki í sögu læknavísindanna og tók fjórtán klukkustundir.
Sylwia segir Guðmund Felix þakklátan íslensku þjóðinni sem hefur stutt hann dyggilega alla tíð og bað hana að skila kveðju til Íslendinga. „Hann hefði ekki getað gert þetta án ykkar,“ segir hún.
Viðtalið við Sylwíu í held sinni má sjá í myndbandinu hér fyrir neðan: