Móðir eins árásarþolans frá átökunum í Borgarholtsskóla í gær steig fram með yfirlýsingu á Facebook-síðu sinni í dag, í opinni færslu. Henni gremst mjög að sagt hafi verið frá því í einhverjum fréttum að uppgjör vegna fíkniefnaskuldar hafi verið orsök árásanna.

Móðirin segir að sonur sinn hafi aldrei neytt fíkniefna en að hann hafi verið látinn gjalda fyrir að stöðva forpsprakka slagsmálanna í að ganga á skrokk á stúlku fyrir nokkru síðan: „Síðan þá hefur honum verið hótað barsmíðum og í fyrradag barst honum til eyrna að það væri verið að planleggja stunguárás á sig,“ segir hún og bætir við að árásarmennirnir hafi reynt að narra hann út í Spöng sem er rétt hjá Borgarholtsskóla.

Hann hafi hins vegar þess í stað hringt í bróður sinn og sagt honum frá þeim vandræðum sem hann væri kominn í. Bróðir hans hafi reynt að miðla málum en þá hafi brotist út slagsmál þar sem árásarmennirnir hafi ráðist á báða syni hennar og þar hafi meðal annars verið beitt hafnaboltakylfu og hnífum. Séu synir hennar mikið lemstraðir, með djúpa skurði á höfði. Þá sé einn nemandi handleggsbrotinn eftir að hafa reynt að aðstoða bræðurna.

„Ég bið ykkur að róa ykkur í að dæma það sem þarna fór fram, þetta er svakalega erfitt. Ég bendi á að synir mínir voru ekki leiddir burtu frá hvorki skóla né bráðamóttöku í járnum, þeir eru með stöðu þolenda í þessu máli,“ segir móðirin.