Stöð 2 fjallaði ítarlega um árásina sem átti sér stað í Borgarholtsskóla í dag í fréttatímanum í kvöld. Nemendur í Borgarholtsskóla voru fluttir á slysadeild eftir að árás var gerð í skólanum á 2. hæð hússins laust fyrir kl. 13 í dag. Vísir greindi fyrst frá árásinni en DV og aðrir fjölmiðlar hafa fjallað mikið um málið í dag.
Eftir árásina hópuðu nemendur sig saman fyrir utan skólann og fór fréttamaður Stöðvar 2 á svæðið og ræddi meðal annars við nemanda. Athygli vakti þó að einhverjir nemendur voru langt frá því að vera ánægðir með það að fréttamenn væru á svæðinu.
„Talið er að um einhvers konar uppgjör milli hópa hafi verið að ræða og voru ekki allir sáttir með veru fréttamanna á svæðinu,“ sagði Erla Björg Gunnarsdóttir, fréttamaður Stöðvar 2, í innslaginu um árásina þegar myndefni af nokkrum strákum var birt. Búið var að sjá til þess að andlit þeirra þekktust ekki í myndefninu.
„Drullaðu þér í burt. Burt, núna. Vinur minn lenti í þessu, drullaðu þér í burtu, NÚNA,“ öskraði einn strákurinn á frétta- og upptökufólk Stöðvar 2 og ljóst var að hann og félagar hans væru virkilega ósáttir með starfslið Stöðvar 2. Þá reyndi sá sami einstaklingur einnig að hylja myndavélina með hendinni sinni.
Grafalvarlegt mál
Vísir ræddi síðan við Ársæl Guðmundsson, skólameistara Borgarholtsskóla, um málið. Ársæll sagði að um grafalvarlegt mál væri að ræða sem mun verða til þess að íslenskt samfélag breytist. „Við höfum rætt þetta til fjölda ára, skólastjórnendur í framhaldsskólum, vegna atburða erlendis. Hvernig við séum í stakk búin að mæta svona,“ sagði Ársæll.
„Hér í Borgarholtsskóla eru mjög margir inngangar í skólann. Við höfum lokað mjög mörgum þessara innganga. Svo kemur Covid og þá er það orðið kostur að hafa marga innganga, til að geta dreift nemendum um skólann. En reynist svo ókostur þegar svona gerist. Við munum allt skólasamfélagið, ekki bara í Borgarholtsskóla, fara yfir alla okkar verkferla.“