Um 30.000 manns hafa nú skrifað undir áskorun til stjórnvalda um að falla frá breytingu á aldursmörkum kvenna sem boðaðar eru í skimun fyrir brjótakrabbameini. Um áramótin hækkuðu aldursmörkin úr 40 ára í 50 ára.
Í texta sem fylgir áskoruninni segir:
„Nýjar reglur kveða á um breyttan aldur kvenna í brjóstamyndatökur. Við biðjum því heilbrigðisráðherra og forsætisráðherra um að endurskoða þessar nýju reglur þannig að þær leggi ekki konur í óþarfa hættu og bjargi því lífum með því að færa reglurnar aftur í sitt fyrra form þannig að allar konur fái sína fyrstu boðun í myndatöku aðeins 40 ára. Einnig breyttu þeir boðunum í leghálsskimanir á þann veginn að konur verða boðaðar á fimm ára fresti frekar en þriggja ára áður. Þetta viljum við að verði endurskoðað.“
Greindist 46 ára
Meðal þeirra kvenna sem stigið hafa fram og tjáð sig um þessi áform stjórnvalda er Ingibjörg Sigurðardóttir, 51 árs Hafnfirðingur:
„Mitt krabbamein fannst í reglubundnu eftirliti í Leitarstöð Krabbameinsfélagsins. Ég var þá 46 ára. Ef ég hefði ekki sinnt þessu boði um að mæta í skimun þá væri ég sennilega ekki hér. Þetta vegna eru þetta mjög sjokkerandi fréttir fyrir mig. Ég vona að þetta verði endurskoðað, því þetta má ekki gerast,“ segir Ingibjörg.
Þess má geta að undirskriftum fjölgar stöðugt og átak hefur verið í gangi fyrir málstaðinn meðal kvenna á samfélagsmiðlum.