Laust eftir klukkan 23 í gærkvöld var tilkynnt um líkamsárás við Hvaleyrarvatn í Hafnarfirði. Hópur ungra manna með barefli er sagður hafa ráðist á unglinga sem þar voru. Frá þessu greinir í dagbók lögreglu en sagt er að málið hafi verið afgreitt með aðkomu foreldra og ekki sé vitað um meiðsli.
Laust fyrir klukkan 8 í gærkvöld var tilkynnt um slys í Laugardalslaug. Kona féll og meiddist á hendi. Var konan flutt með sjúkrabíl til aðhlynningar á Bráðadeild.
Á sjötta tímanum í gærdag var maður í annarlegu ástandi handtekinn á veitingastað í hverfi 108 í Reykjavík. Var hann búinn að valda einhverjum skemmdum á veitingastaðnum. Maðurinn var sökum ástands síns vistaður í fangageymslu lögreglu.
Laust fyrir kl. 7 í gærkvöld voru tveir menn í annarlegu ástandi handteknir í Kópavogi, grunaðir um líkamsárás. Mennirnir fengu aðhlynningu á Bráðadeild og voru svo vistaðir fyrir rannsókn máls í fangageymslu lögreglu.
Aðrir tveir menn voru síðan handteknir í Kópavogi í nótt, á öðrum tímanum, eftir líkamsárás. Annar maðurinn átti að vera í sóttkví. Mennirnir voru vistaðir í fangageymslu.