Dauðadrukkinn maður, sem átti að vera á sóttvarnahúsi en hafði yfirgefið það, var handtekinn við Hlemm laust fyrir kl. 23 í gærkvöld. Maðurinn fór ekki að fyrirmælum lögreglu og var vistaður í fangageymslu.
Þetta kemur fram í dagbók lögreglunnar á höfuðborgarsvæðinu.
Þar segir einnig frá því að afskipti voru höfð af konu í verslun í hverfi 108 í Reykjavík á þriðja tímanum í nótt. Er konan grunuð um vörslu fíkniefna. Var hún ásamt kærasta sínum staðin að hnupli í versluninni en hún reyndi að stela kerti. Bæði málin voru afgreidd með vettvangsskýrslum, segir í dagbókinni.
Auk þessa er greint frá nokkrum umferðalagabrotum en miðað við föstudagskvöld virðist nóttin hafa verið fremur róleg hjá lögreglu.