Þórólfur Guðnason sóttvarnalæknir var boðaður í bólusetningu á dögunum en mætti ekki. Meðal þeirra sem fá bólusetningu þessa dagana er heilbrigðisstarfsfólk utan stofnana en hann er hluti af þeim hópi. RÚV greinir frá.
Þórólfur kom með þau tilmæli til heilbrigðisstarfsfólks utan stofnana sem ekki meðhöndluðu sjúklinga að bíða með að láta bólusetja sig þangað til komið væri að þeirra aldurshópi.
„Ég bíð eftir að komi að mér í aldurshópi. Það er náttúrulega ekki eðlilegra en að ég fari bara eftir mínum leiðbeiningum. Ég mun fara þegar að mér kemur aldurslega séð eins og aðrir,“ segir Þórólfur en hann verður 68 ára í októbermánuði.
Samkvæmt bólusetningadagatalinu á hann von á því að vera boðaður í bólusetningu seinna í þessum mánuði en verið er að klára að bólusetja fólk á aldrinum 70-79 ára áður en komið er að 60-69 ára.