Maðurinn sem féll fyrir hendi morðingja fyrir utan hús sitt í Rauðagerði á laugardagskvöld heitir hét Armando Beqiri. Hann var frá Albaníu en hafði verið búsettur hérlendis um árabil. Armando starfaði meðal annars við dyravörslu.
Armando lætur eftir sig íslenska sambýliskonu og ungt barn og átti von á öðru barni.
Armando Bequiri var fæddur þann 16. febrúar árið 1988 og hefði því orðið 33 ára í dag.
Vinir og samstarfsmenn Armando bera honum afar vel söguna, segja hann hafa verið harðduglegan, heiðarlegan, vingjarnlegan og traustan.
Armando er sagður hafa verið skotinn 5-10 skotum með byssu á laugardagskvöldið. Skömmu eftir að lögreglulið kom á vettvang var maður handtekinn gegna málsins í Garðabæ. Hann er sagður frá Litháen og var úrskurðaður í gæsluvarðhald út næsta föstudag.
Þrjár frekari handtökur áttu sér stað vegna málsins í nótt, meðal annars á Suðurlandi. Lögregla verst allra frétta af rannsókninni að undanskilinni eftirfarandi tilkynningu sem hún sendi frá sér um hálfellefuleytið í morgun:
„Þrír voru handteknir í viðamiklum aðgerðum Lögreglunnar á höfuðborgarsvæðinu í gær í tengslum við rannsókn hennar á manndrápi í austurborginni um síðustu helgi. Framkvæmdar voru húsleitir í umdæminu og utan þess, en við aðgerðirnar naut Lögreglan á höfuðborgarsvæðinu aðstoðar bæði sérsveitar ríkislögreglustjóra og annarra lögregluembætta.
Ekki er hægt að veita frekari upplýsingar um málið að svo stöddu.“