Alls eru nú tíu inniliggjandi á sjúkrahúsi vegna Covid-19. Fjölgaði þeim um tvo í dag. Af þessum tíu eru þrír á gjörgæslu. Þetta kom fram í frétt RUV um málið. Þar sagði einnig að meðalaldur þeirra sem nú væru inniliggjandi væri 50 ár.
Fyrr í dag sagði DV frá því að 33 hafi greinst með kórónaveiruna. Rétt tæpur helmingur þeirra var ekki í sóttkví. Það er þó betra hlutfall en verið hefur í þessari „þriðju bylgju,“ og af fyrri orðum sóttvarnayfirvalda að dæma ber því að fagna. Í upphafi þessarar bylgju var haft eftir Þórólfi Guðnasyni sóttvarnalækni að von væri á fjölgun innlagna um það bil viku til tveimur eftir að fjölgunar á Covid-19 tilfellum varð vart. Sú fjölgun hefur nú raungerst.
Samkvæmt Covid.is eru nú 1.747 í sóttkví og 551 í einangrun. Nýgengi innanlandssmita er nú 140,7 á hverja 100.000 íbúa hér á landi. Hefur sú tala ekki verið hærri síðan um miðjan apríl, í lok fyrstu bylgjunnar.
