Á sjötta tímanum í gær réðust tveir menn á þann þriðja, ógnuðu honum með eggvopni og rændu bifreið hans. 40 mínútum síðar var bifreiðinni ekið aftan á aðra bifreið á Breiðholtsbraut og af vettvangi. Tvímenningarnir voru síðan handteknir á öðrum tímanum í nótt eftir að þeir höfðu ógnað starfsmanni verslunar í Kópavogi með eggvopni eftir að hafa stolið vörum í versluninni. Mennirnir eru nú í fangageymslu. Bifreiðin fannst við verslunina.

Á sjötta tímanum í gær var ofurölvi maður handtekinn við sparkvöll í hverfi 104 þar sem börn og unglingar voru að leik. Maðurinn var vistaður í fangageymslu.

Á áttunda tímanum í gærkvöldi var maður handtekinn í Bústaðahverfi. Hann var með skurð á hendi, sem blæddi úr, og var nærri vettvangi þar sem rúða hafði verið brotin. Maðurinn var fluttur á slysadeild til aðhlynningar. Nokkur spor voru saumuð í hann og síðan var hann fluttur í fangageymslu.

Fimm ökumenn voru handteknir í gærkvöldi og nótt, grunaðir um að vera undir áhrifum áfengis og/eða fíkniefna.

Síðdegis í gær var tilkynnt um hugsanlegt brot tveggja erlendra verkamanna á sóttkví í Kópavogi. Þeir eru sagðir hafa verið úti á meðal fólks en þeir eiga að vera í sóttkví til 11. október. Málið er í rannsókn.