Mál Héraðssaksóknara gegn brennuvarginum á Bræðraborgarstíg var þingfest í dag í Héraðsdómi Reykjavíkur. Maðurinn er ákærður fyrir að hafa orðið þrem að bana og fyrir íkveikju.
Ekki er vitað til þess að einn og sami maðurinn hafi verið ákærður fyrir svo mörg morð. Á 6. áratugnum myrti maður fjölskyldu sína en framdi sjálfur sjálfsmorð áður en hann var ákærður.
Fram kom við þingfestingu málsins að geðmat hefur þegar farið fram og að maðurinn sé ósakhæfur að mati geðlækna. Það þarf þó ekki að þýða að dómstóll taki sér þá afstöðu, enda er ósakhæfi fyrst og fremst lagalegt mat, ekki læknisfræðilegt. Dómari er þar af leiðandi ekki bundinn af málinu. Símon Sigvaldason, dómstjóri, mun líkast til dæma í málinu.
Verjandi mannsins, Stefán Karl Kristjánsson, sóttist eftir því að þinghaldið yrði lokað en Kolbrún Benediktsdóttir varahéraðssaksóknari mótmælti kröfunni. Svo fór að dómari lokaði ekki þinghaldinu, og var blaðamönnum því ekki vísað út. Færði Stefán þau rök fyrir að þinghald yrði lokað að matsgerð á geðheilbrigði mannsins yrði til umfjöllunar í dómsal og að lýsingar á atvikum yrðu „lítt geðslegar.“
Þegar dómari hafði ákveðið að þinghald yrði ekki lokað var gert stutt hlé á þinghaldi á meðan sakborningur var leiddur inn í réttarsal í grárri hettupeysu með andlitsgrímu. Við hlið hans sátu lögmaður hans, Stefán Karl, og túlkur sem túlkaði það sem fram fór yfir á móður mál hins ákærða. Farið var yfir ákæruna þegar hann hafði komið sér fyrir og ákærði spurður hver afstaða hans væri til ákærunnar. maðurinn neitaði sök.
Málinu var að lokum frestað aftur og var maðurinn leiddur út af lögreglumönnum Héraðssaksóknara.