Bakarískeðja Jóa Fel var í gær úrskurðuð gjaldþrota í héraðsdómi. Gjaldþrotabeiðnin kom frá Lífeyrissjóði verslunarmanna sem lagði fram kröfuna um gjaldþrotaskipti vegna ógreiddra iðgjalda í lífeyrissjóðinn heilt ár aftur í tímann. Þó höfðu iðgjöldin verið dregin af launaútborgun starfsmanna.
Samkvæmt óstaðfestum heimildum Stundarinnar vinnur Jói Fel nú að því að kaupa eignir nauðsynlegar rekstrinum til baka úr þrotabúin með aðstoð fjárfesta.
Grímur Sigurðsson lögmaður var við úrskurð héraðsdóms skipaður skiptastjóri þrotabúsins. Þetta staðfestir Grímur í samtali við blaðamann DV en vildi lítið annað segja. Nú tekur við hefðbundið ferli þar sem auglýst verður eftir kröfum í þrotabúið og eignirnar svo teknar til skiptanna upp í þær skuldir. Óljóst er hverjir stærstu kröfuhafarnir eru annað en að Lífeyrissjóður verslunarmanna hlýtur að vera einn þeirra.
DV ræddi á mánudaginn við Jóhannes Felixsson sem vildi lítið tjá sig um stöðu bakarískeðjunnar. Sagði hann þó að „eitthvað gæti gerst í vikunni.“ Nú er ljóst að tilraunir Jóa til þess að bjarga rekstrinum hafa ekki tekist. „Ég er bara á fundum alla vikuna, allt er í vinnslu og ég veit ekkert,“ sagði Jói á mánudaginn.
Sjá nánar: Jói Fel um erfiðleikana – „Eitthvað gæti gerst í vikunni“
Um er að ræða annað gjaldþrot fyrirtækis í eigu Jóa Fel á rétt rúmu ári. Í ágúst í fyrra greindi DV frá því að Guðni bakari væri gjaldþrota. Sá rekstur var ótengdur rekstri bakarískeðjunni Jóa Fel.
