Bjarni Guðjónsson aðstoðarþjálfari KR og fyrrum landsliðsmaður í knattspyrnu er í spjalli við Jóhann Skúla í Draumaliðinu sem kom út í dag. Bjarni átti farsælan feril sem atvinnumaður og velur bestu samherjana sína af ferlinum í viðtalinu.
Árið 2005 var Bjarni í herbúðum Plymouth á Englandi en liðið fékk á þeim tíma Taribo West, varnarmaðurinn frá Nígeríu varð heimsfrægur á ferli sínum fyrir að vera með furðulegar hárgreiðslur.
West var kominn af léttasti skeiðinu þegar hann mætti í Plymouth en hann hafði átt farsælan feril og spilaði meðal annars með Inter og AC Milan.
„Ég spilaði með honum, eini leikmaðurinn sem tilkynnti alltaf sjálfan sig áður en hann kom inn í klefann. Eldgömul bygging, við löbbuðum alltaf í gegnum hjá búningastjóranum og í gegnum sturtuna og svo inn í klefa. Þegar West labbaði í gegn heyrðist alltaf kallað „T West“. Það bergmálaði alltaf í sturtunni,“ sagði Bjarni þegar hann rifjaði upp tímann með West.
Bjarni gat ekki ímyndað sér á þessum tíma að West hefði spilaði með Inter. ,,Fínn náungi en hann gat ekkert í fótbolta, ég veit ekki hvað hann sagðist vera gamall þarna en hann var að minnsta kosti 15 árum eldri.“