Stundin greindi frá því í dag að Þorbjörn Þórðarson, fyrrverandi fréttamaður Stöðvar 2 og lögfræðingur, hafi tekið saman safn af skjáskotum sem höfðu að geyma ummæli fréttamanna RUV á samfélagsmiðlum. Skjáskotin voru svo notuð sem fylgigögn í kæru Samherja til Siðanefndar RUV. Snýr kæran að ætluðum brotum fréttamanna á siðareglum, sem snúa m.a. að ummælum um viðfangsefni frétta sinna á opinberum vettvangi, svo sem á samfélagsmiðlum. Hafa lögfræðingar sagt að siðareglurnar í Ofanleitinu standist enga skoðun, og traðki líklega á stjórnarskrárvörðu tjáningarfrelsi þeirra sem þar starfa.
Skjáskotin, sem eru samkvæmt frétt Stundarinnar, að minsta kosti fjögur, prýða öll prófílmynd Þorbjarnar í neðri vinstra horninu. Málið hlýtur að þykja heldur klaufalegt, sér í lagi í ljósi reynslu Þorbjarnar sem blaðamanns.
Tvö af skjáskotunum fjórum sem Stundin birti, má sjá hér að neðan:
Blaðamennirnir sem Samherji hefur kært til siðanefndar eru ellefu talsins. Það eru þau Freyr Gígja Gunnarsson, Stígur Helgason, Aðalsteinn Kjartansson, Helgi Seljan, Þóra Arnórsdóttir, Tryggvi Aðalbjörnsson, Sigmar Guðmundsson, Sunna Valgerðardóttir, Snærós Sindradóttir, Rakel Þorbergsdóttir og Lára Ómarsdóttir.
Kæru Samherja til siðanefndar RUV má sjá hér að neðan og upphafleg frétt DV um málið má nálgast hér: Samherji kærir 11 blaðamenn RUV til siðanefndar