Kristinn Theodórsson, fyrrverandi stjórnarmaður í Siðmennt, segir ekki rétt að ekki hafi verið samskipta- og samstarfserfiðleikar vegna framgöngu Jóhanns Björnssonar sem í sumar var sagt upp starfi sínu sem kennslustjóri fermingarfræðslu Siðmenntar eftir aldarfjórðungs starf.
Uppsögn Jóhanns hefur vakið undrun margra og almennt fengið neikvæð viðbrögð. Sérstaklega þykir mörgum skrýtið, og þar á meðal Jóhanni sjálfum, að samskiptaerfiðleikar hafi verið ein af ástæðum uppsagnarinnar. Þessu er Kristinn Theódórsson ekki sammála.
Kristinn birtir pistil um málið á Facebook-síðu sinni í dag. Hann segir að starfslok Jóhanns séu ekki eins skrýtið mál og margir vilji vera láta. Hann segir ásakanir um erfið samskipti við Jóhann ekki vera úr lausu lofti gripnar:
„Ég þekki þokkalega til og þetta er ekki svo skrýtið mál. Jóhann er skemmtilegur gaur og góður félagi – og hefur ásamt öðrum um árabil byggt upp mjög flottan grunn að kennslu í borgaralegri fermingu. Ég var sjálfur eins og hann í stjórn félagsins þegar það var lítið áhugamannafélag. Það var þroskandi og gaman. Þegar krafan um formlegheit og formfestu varð meiri fann ég þó að nýtt fólk með sterkari bakgrunn úr stöðluðu félagastarfi fúnkeraði betur en ég gerði. Ég hætti því í rólegheitum að starfa í stjórn. Mér finnst stundum eins og Jóhann hafi að sama skapi síður fúnkerað vel þegar stærð félagsins fór að kalla á meiri formfestu.
Jóhann er þó auðvitað starfandi kennari og öllu vanur og kannski rangt af mér að líkja honum við sjálfan mig. En ásakanir um erfið samskipti á köflum og ýmsa árekstra eru ekki úr lausu lofti gripnar, þótt hann geri lítið úr þeim. Það er því alveg eðlilegt að stjórnin hafi farið að íhuga hvort það sé gott að kennslustýringin sé öll á herðum eins manns og það í svona mörg ár í röð. Enginn á að vera ómissandi, eins og maður segir stundum.“
Kristinn segist telja þessa breytingu hluta af eðlilegum kynslóðaskiptum í félaginu. Hann hafi sjálfur starfað með Jóhanni í Siðmennt þegar félagið var miklu minna og naut minni viðurkenningar. Stækkun félagsins kalli á skipulagðari vinnubrögð og við hæfi sé að eldri félagar eins og hann og Jóhann dragi sig í hlé. Oft sé erfitt fyrir eldri félaga að láta yngra fólki eftir stjórnartaumana.
Kristinn segir að krísur og átök séu eðlilegir vaxtarverkir í félögum. Gefur hann í skyn að árekstur stjórnar Siðmenntar við Jóhann Björnsson hafi verið óumflýjanlegur:
„Það er hinsvegar auðvitað leiðinlegt að upp komi ágreiningur og vinslit í annars góðum hópi fólks. Það hef ég þó heyrt um allskyns félög, að fæst komast þau hjá því að díla við einhverjar krísur og vaxtarverki. Sumir árekstrar virðast óumflýjanlegir.“
Pistil Kristins í heild og umræður undir honum má lesa með því að smella á tengilinn hér að neðan:
