Héraðssaksóknari hefur birt manni ákæru fyrir manndráp og íkveikju á Bræðraborgarstíg í lok júní þessa árs. Mbl.is sagði frá þessu í morgun. Maðurinn er á sjötugsaldri og hefur setið í gæsluvarðhaldi síðan í júní. Gæsluvarðhald yfir manninum var framlengt í dag um fjórar vikur.
Kolbrún Benediktsdóttir, varahéraðssaksóknari, mun sækja málið fyrir hönd Héraðssaksóknara. Maðurinn er ákærður fyrir brot á 211. grein almennra hegningarlaga sem og 164. grein.
211. grein segir: Hver, sem sviptir annan mann lífi, skal sæta fangelsi, ekki skemur en 5 ár, eða ævilangt.
164. grein segir: Valdi maður eldsvoða, sem hefur í för með sér almannahættu, þá varðar það fangelsi ekki skemur en 6 mánuði. Refsing skal þó ekki vera lægri en 2 ára fangelsi, hafi sá, er verkið vann, séð fram á, að mönnum mundi vera af því bersýnilegur lífsháski búinn eða eldsvoðinn mundi hafa í för með sér augljósa hættu á yfirgripsmikilli eyðingu á eignum annarra manna.
Þrír pólskir ríkisborgarar létust í brunanum.