Til stóð að vísa Kehr-fjölskyldunni frá landi í nótt og tjáir Sema sig um það á samfélagsmiðlinum Twitter. Hún segir samkenndina, samstöðuna og réttlætið hafa tapað fyrir kerfisbundnu ofbeldi á flóttabörnum og að það væri í boði íslenskra stjórnvalda. „Illskan hefur sigrað mannúðina og kærleikann. Pólitísk staða flokka og fólks skiptir meira máli en öskrandi hræðsla, átakanleg sorg og ískrandi þjáningar ungra barna,“ segir Sema.
„Framtíð og öryggi barna sem ekkert hafa unnið sér til saka annað en að hafa verið neydd á flótta frá heimalandi sínu er fórnað fyrir pólitískan (ó)frama ráðherra í ríkisstjórn Íslands. Hafið ævarandi skömm fyrir!“
Með tístinu deilir Sema mynd af börnum fjölskyldunnar. „Þetta eru systkinin Abdalla, Rewida, Hamza og Mustafa. Þau eru tveggja til tólf ára gömul. Þessi börn munu alltaf eiga stað í hjarta mínu – sem nú er í molum – og vonandi í hjarta okkar allra!“ segir hún. „Íslensk stjórnvöld hafa ákveðið að hér megi þau ekki eiga heima – eins og ekkert sé eðlilegra og einfaldara. Í stað þess að grípa til aðgerða til varnar réttindum barnanna hafa íslensk stjórnvöld ákveðið að reka þessi börnin úr landi. Því verður ekki gleymt!“
Sema segir börnin nú vera aftur á leiðinni á flótta um ókomna tíð. „Því mun fylgja enn frekari ótti, óvissa, óöryggi og neyð. Því mun fylgja frekari áföll og örvænting um árabil,“ segir hún. „Sagan mun dæma þau hart sem bera ábyrgð á því. Rétt eins og sagan hefur ávallt dæmt þau sem fremja grimmdarverk.“