Héraðsdómur Reykjavíkur hefur dæmt tvo menn í fjögurra og þriggja mánaða fangelsi fyrir stórfelldan og útsmoginn þjófnað á sígarettum úr Leifsstöð.
Þjófnaðurinn var þaulskipulagður af hálfu mannanna, en þeir bókuðu sér í samtals sextán flugmiða frá Leifsstöð til þess eins að komast inn á fríhafnarsvæðið og stela þar sígarettum. Mennirnir fóru ekki alltaf saman og því telja skiptin fleiri en átta. Þá voru þeir dæmdir til þess að greiða fríhöfninni samanlagt rúma milljón í skaðabætur fyrir sígaretturnar sem þeir stálu. Mestu tóku mennirnir 25 karton í einni ferð, og í eitt skipti innrituðu þeir sig þrjá daga í röð í flug frá Íslandi.
Mennirnir fundust ekki og var fyrirkall birt í lögbirtingablaðinu. Það skilaði sér þó ekki í því að þeir mættu, og var því dómur kveðinn upp í fjarveru mannanna. Gera má ráð fyrir að ekki muni takast að birta mönnunum dóminn heldur.
Sem fyrr segir var verðmæti sígarettanna sem þeir stálu samanlagt um milljón. Því vakti skaðabótakrafa fríhafnarinnar talsverða athygli, en hún hljóðaði upp á rúmar 13 milljónir. Það jafngildir því að mennirnir yrðu látnir borga um 8.300 krónur fyrir hvern tollfrjálsan sígarettupakka sem þeir stálu.
Dómstóllinn tók kröfu Fríhafnarinnar ekki til greina.