Starfsmaður í aðalbyggingu Háskóla Íslands var greindur með COVID-19 smit um helgina. Þetta kemur fram í tölvupósti frá rektor til nemenda og starfsfólks háskólans.
Í bréfinu kemur fram að gripið hafi verið til allra nauðsynlegra ráðstafana í samstarfi við smitrakningateymi Almannavarna og sóttvarnalæknis til að hindra útbreiðslu smitsins. Haft hefur verið samband við alla sem þurfa að fara í sóttkví vegna málsins en það eru rektor sjálfur og tveir aðrir starfsmenn í aðalbyggingu. Starfsstöðvar þeirra sem eru í sóttkví hafa verið sótthreinsaðar rækilega.