Trans Jesús svonefndur, eða mynd sem sýnir frelsarann hoppandi kátan með skegg og brjóst, hefur verið fjarlægð af Facebook-síðu og vefsíðu þjóðkirkjunnar.
Myndin hefur vakið mikið umtal þar sem þjóðin hefur skipst í fylkingar eftir því hvort menn séu fylgjandi trans Jesú eða á móti honum.
Fjöldi presta og einstaklinga hafa vakið athygli á málinu í greinaskrifum á síðum dagblaða eða á samfélagsmiðlum og hefur verið mikill hiti í umræðunni.
Umrædd mynd birtist sem kynningarefni fyrir Sunnudagaskólann. Séra Hildur Björk Hörpudóttir, sviðsstjóri fræðslusviðs þjóðkirkjunnar, sagði að með myndinni væri þeim skilaboðum komið áleiðis að Kristur væri fyrir alla, ekki bara hvíta gagnkynhneigða karlmenn.
„Í þessu ljósi er Kristur í allt í einu – getur verið karl með brjóst – kona með skeggrót. Jesú getur líka verið non–binary og trans. Kristur er fyrst og fremst boðberi kærleika, mannvirðingar, umhverfisvitundar og framtíðar sem við öll þráum og viljum. Þar sem við erum þau sem við erum og njótum virðingar, kærleika og réttlætis,“ skrifaði Séra Hildur inn á Facebook-hópinn Hinseginspjallið.
Upplýsingafulltrúi Þjóðkirkjunnar, Pétur Georg Markan, sagði í samtali við Fréttablaðið í dag að Trans Jesú hafi verið fjarlægður því tími var kominn til að skipta um mynd. Hann prýði hins vegar enn strætó og ekki útilokað að hann verði birtur aftur á síðu kirkjunnar.
DV vekur þó athygli á því að myndina er ekki lengur að finna í myndabanka kirkjunnar á Facebook. Hún hefur því verið fjarlægð sem er ekki nauðsynlegt til að skipta um svonefnda „Cover-mynd“ á þeim miðli, enda er enn hellingur af myndum sem áður hafa verið brúkaðar í þeim tilgangi enn til í myndasafninu.
Myndin hefur jafnframt verið fjarlægð af vefsíðu Sunnudagaskólans.