Landlæknir hefur gefið út nýjar leiðbeiningar vegna gangna og rétta í haust. Áður hafði verið miðað við 2 metra, og því gefin út „tveggja kinda regla,“ en í kjölfar þess að tveggja metra reglan varð að eins meters reglu, er nýtt viðmið: Eins kinda reglan.
Enn fremur hefur þeim fjölgað sem mega sinna réttarstörfum úr 100 manns í 200. Enn er þó mælst til þess að áfengi sé ekki haft um hönd og að hugsað sé að almennum sóttvörnum. Til dæmis að ekki sé heilsað með handabandi, að áhöld séu ekki samnýtt og að fjallaskálar séu sótthreinsaðir og þrifnir að lokinni notkun.
Enn fremur segir í reglunum að almenna reglan fyrir árið 2020 sé og verði áfram að aðeins þeir sem ahfa hlutverk í göngum og réttum mæti þangað. Börn fædd 2005 eða síðar eru undanskilin fjöldatakmörkun.
Til að framfylgja ofangreindum reglum verður hliðvarsla við aðkeyrslu að réttum og þangað inn verður aðeins hleypt þeim sem þar eiga erindi.