Sterkur grunur er um COVID-19 smit hjá íbúa á dvalarheimilinu Hrafnistu í Laugarás í Reykjavík. Beðið er eftir niðurstöðu úr sýnatöku til að skýra málið frekar. Búið er að flytja umræddan einstaklinginn á Landspítalann vegna veikinda, það var þó gert áður en grunurinn kom upp. Fréttablaðið greinir frá þessu, en þar kemur fram að María Fjóla Harðardóttir, framkvæmdastjóri heilbrigðissviðs Hrafnistuheimilanna staðfesti þetta.

„Við erum að fara með í gegnum starfsfólk og við erum að loka deildum og aðgreina deildirnar frá öðrum deildum heimilisins, bara til öryggis. Betra að gera of mikið en of lítið.“

Deildin sem íbúinn bjó á er komin í sóttkví frá öðrum deildum. Það sama á við um deildina sem er næst henni.

Alma D. Möller Landlæknir var spurð út í málið á upplýsingafundi Almannavarna í dag. Hún sagðist ekki geta staðfest neitt.