Löngum og viðburðaríkum ferli Ólafs Helga Kjartanssonar í löggæslu á Íslandi lýkur í dag. Þetta staðfestir hann í samtali við blaðamann DV.
Ólafur Helgi sagði inntak fyrri fréttar DV um uppnám á starfsstöð Lögreglustjórans á Suðurnesjum fullkomlega rangt. Honum hafi ekki verið vísað út. Hins vegar hafi hann, að höfðu samráði við embættismenn dómsmálaráðuneytisins sem komu til Keflavíkur í dag, ákveðið að fara í orlof frá og með mánudeginum eftir helgi. Því er síðasti dagur hans í embætti í dag, föstudag.
Sjá nánar: Uppnám á starfsstöð Lögreglustjórans á Suðurnesjum – Vísa á Ólafi frá staðnum með valdi
„Þau komu að minni ósk og samþykki til þess að ganga frá því að ég gæti byrjað orlof. Atburðir dagsins hafa ekkert með það að gera enda eru engir atburðir dagsins,“ sagði Ólafur Helgi um komu embættismanna ráðuneytisins til Keflavíkur í dag. Samkvæmt heimildum DV voru þar á ferð Grímur Hergeirsson, verðandi settur lögreglustjóri á Suðurnesjum, og Haukur Guðmundsson, ráðuneytisstjóri í dómsmálaráðuneytinu.
Aðspurður um hvað taki við segir Ólafur að hann hefji störf í nýju og spennandi starfi í dómsmálaráðuneytinu. Starfið sem um ræðir er staða sérfræðings í dómsmálaráðuneytinu í málefnum landamæra Íslands og þátttöku Íslands í Frontex, landamærastofnun Evrópusambandsins.
Sjá nánar: Verður sérfræðingur í ráðuneyti Áslaugar Örnu
Ólafur segist skilja við embættið í sátt: „Ég fer frá embættinu sáttur og á ekki uppgerðar sakir við nokkurn mann.“ Hann segir það vissulega mjög sérstakt að upplifa sinn síðasta dag í embætti, en að hann hlakki til orlofsins.
Orlofið hyggst Ólafur nýta í hvíld og að safna kröftum. Hann hafi ekki tekið sér frí lengi og er ekki búinn að skipuleggja sumarfríið sitt nú. „Ég þarf aðeins að hugsa mig um og hugsa um mig og fara í garðinn. Það þarf að losa hann við illgresi,“ sagði Ólafur.
Ferill Ólafs í löggæslu spannar áratugi og teygir sig um allt Suðurland og vestur á firði. Þeim ferli er, eftir daginn í dag, lokið.
„Hugsaðu nú um það, að þú ert sko að missa einn skemmtilegasta viðmælanda þinn,“ sagði Ólafur að lokum. Blaðamaður gerir ekki athugasemdir við það.
