Fjallað er um mál Konráðs Hrafnkelssonar í belgískum fjölmiðlum í dag. Konráð býr í Brussel í Belgíu en ekkert hefur til hans spurst síðan á fimmtudagsmorgun. Síðast sást til hans fyrir utan McDonalds-veitingastað í miðbæ Brussel um níuleytið á fimmtudagsmorguninn. Í frétt belgíska fjölmiðilsins sem hér er vísað til er haft eftir frænda Konráðs að það sé ólíkt honum að láta ekki vita af sér.
Konráð hefur búið í Belgíu árum saman og stundar nú flugnám. Hann starfar einnig fyrir matarsendingafyrirtækið Deliveroo. Unnusta Konráðs, Kristjana Diljá Þórarinsdóttir, og frændi hans, Peter-Paul Van Der Werff, skipulögðu eftir megni leit að Konráð í gær, en beðið er gagna frá lögreglu varðandi myndefni úr eftirlitsmyndavélum á svæðinu þar sem síðast sást til Konráðs.
„Við skipulögðum leit sjálf og tóku um 20 manns þátt í henni, vinir hans og vinir mínir,“ segir Kristjana Diljá í spjalli við DV.
Konráð er 27 ára gamall og verður 28 ára á þessu ári. Hann er 1,78 m á hæð, var klæddur í bláar gallabuxur og hvíta Nike-skó. Hann var með bakpoka og húfu á höfði (hvorttveggja dökkt) og svört Marshall heyrnartól. Meðferðis hafði hann blátt reiðhjól.
