Par varð fyrir árás í Vesturbænum í gærkvöld þegar bíll þeirra var stopp á rauðu ljósi á Hringbrautinni. Maður opnaði bílstjóradyrnar og beindi hnífi að hálsi karlmannsins sem sat undir stýri. Skipaði hann honum að fara út úr bílnum. Bílstjóranum tókst ins vegar að verjast árásarmanninum og ýta honum frá bílnum. Hann læsti síðan bílnum og ók af stað. Parið hafði samband við lögreglu sem kom á vettvang.
Konan sem var í bílnum lýsti atvikinu í íbúahópi Vesturbæinga á Facebook en einnig er greint frá því í dagbók Lögreglunnar á höfuðborgarsvæðinu. Þar segir að maður á þrítugsaldri hafi verið handtekinn í vesturborginni eftir að hann hafði gert þrjár ránstilraunir vopnaður hnífi. „Maðurinn veitti handtökunni ekki mótspyrnu og hlýddi skipunum lögreglu. Engum varð líkamlegt mein af brotahrinu mannsins né handtöku lögreglu. Maðurinn var vistaður í fangageymslum í þágu rannsóknar málsins,“ segir í dagbókinni.