James Frager sakar leigusala á Njálsgötu um að hafa hent öllum húsgögnum sínum og öðru dóti út úr íbúð þar sem hann og unnusta hans, Sigrún, hafa búið um nokkurt skeið. Frá þessu greinir hann í Facebook-hópnum Gefins, allt gefins. Hann birti mynd af ástandinu fyrir utan íbúðina sem sýnir gríðarlegt magn af húsgögnum og hlutum. Hann býður fólki að taka húsgögnin endurgjaldslaust.
„Íbúðin er í eigu (fyrrverandi), öskrandi, skóflusveiflandi, glæpaleigusalans okkar. Hann er fyrst og fremst að stunda ólöglegan úburð. Fullt af húsgögnum, eldhúsdót, lítill frystir og allskonar dót. Ég var byrjaður að skoða þetta aðeins, en ég hreinlega höndlaði þetta ekki andlega í meira en nokkrar mínútur. Við getum hvergi tekið þetta, svo það minnsta sem við getum gert er að gefa þetta til nýrra heimila.“
Blaðamaður DV hafði samband við James, sem segir að hann og Sigrún hafi húsaskjól í nokkrar nætur og að þau séu meðvituð um réttindi sín. Hann segir að leigusalinn hafi brotist inn í íbúðina á laugardag ásamt nokkrum mönnum, þá hafi þeir brotið upp hurðina að íbúðinni og stolið Internet- routernum þeirra. Hann segir að þá hafi unnusta hans verið ein heima.
„Í stað þess að fá löglegan útburð braust hann inn, með skóflu og kraftakarl með sér. Í gærmorgun mætti hann ásamt nokkrum mönnum, stal Internet- routernum okkar og tók hurðina af íbúðinni. Við vitum að þetta er mjög ólöglegt,“
„Hún var þarna ein þegar hann braust inn með mönnunum.“
James segir að leigusalinn hafi komið aftur laugardagskvöldið til þess að sjá til þess að þau væru á förum. James hafi þá komið þangað aftur í dag, sunnudag, ásamt börnum Sigrúnar sem eru á táningsaldri, en þá hafi verið búið að skipta um lás á íbúðinni.
Þau hafi þrátt fyrir það komist inn, þökk sé nágranna, en heyrt að leigusalinn væri inni í íbúðinni að öskra. Hann hafi því ákveðið að fara barna Sigrúnar vegna. Svo hafi hann komið aftur og þá hafi dótið verið út um allt fyrir utan íbúðina.
James viðurkennir að þau hafi verið sein að borga leigu, en það hafi fyrst og fremst verið vegna þess að leigusalinn hafi ekki verið búinn að redda húsaleigusamningi og þar af leiðandi hafi þau ekki fengið húsaleigubætur.
Þau hafi verið tveimur mánuðum of sein að borga, en einu sinni hafi þau borgað tvöfalt, þannig í raun einungis verið nokkrum dögum of sein.
Hann vill meina að saga leigusalans sé þakin ofbeldisatvikum. Hann segist hafa verið ansi hræddur við leigusalann. Þau ætla að flytja úr Reykjavík, þeim finnist þau ekki vera örugg.
„Við ætlum að flytja úr Reykjavík. Okkur finnst við ekki vera örugg lengur. Ég bjó á stað í Ameríku þar sem að maður heyrði byssuhvelli á næstum því hverri nóttu, en samt hefur mér aldrei verið ógnað eins mikið og af þessum manni.“
„Ísland er ekki alveg paradísin sem margir halda að það sé.“
Hér að neðan má sjá fleiri myndir af vettvangi:
