Olga Björt Þórðardóttir er ritstjóri og útgefandi bæjarblaðsins Hafnfirðings. Hún velur uppáhaldsnúvitundarstaði sína, vegna þess að núvitund hefur bjargað geðheilsu hennar undir álagi og í kjölfar áfalla.
1. Álftanesfjara
Það eru einhverjir töfrar við að horfa á öldurótið og fallegt sólarlag, hvort sem það er flóð eða fjara og sama hvaða árstíð er.
2. Hvaleyrarvatn
Þessi náttúruperla í Hafnarfirði hefur allt sem þarf til að ná góðri upplifun; gönguleiðir umhverfis vatnið og í skóginum, vaða berfætt, synda eða sigla, eða bara grilla og njóta með fjölskyldu og vinum.
3. Helgafell
Eftir að hafa reynt aðeins á sig á leið upp á Helgafell er einstök tilfinning að finna sér stað fyrir einveru í friði á toppnum (þar er nóg pláss!), setjast niður í endorfínvímu og þakka fyrir heilsuna, lífið og fólkið sitt.
4. Hellisgerði
Ótrúlega fallegur og kyrrlátur staður með álfahólum og Álfabúð í gömlu húsi. Þarna finnst mér notalegast að finna einhvern stað til að setjast í grasið og rýna í náttúrufegurðina, blómin og trén í kringum mig – gjarnan með myndavélina með mér.
Umfjöllunin birtist fyrst í prentuðu helgarblaði DV sem kom út 24. júlí.
