„Ég held við séum bara í nokkuð góðum málum og við höldum áfram að feta okkur eftir þessari braut,“ sagði Þórólfur Guðnason sóttvarnalæknir á upplýsingafundi í dag um COVID-19. Kom fram í máli Þórólfs að innanlandssmit undanfarið virðist að mestu mega rekja til tveggja hópsýkinga. Svo virðist sem það sé að takast að koma böndum á hópsýkingarnar. Þó megi búast við því að fleiri smit greinist á næstunni.

Sjö greindust smitaðir í gær en 500 fóru í sýnatöku og má búast við að þeir hafi flestir talið sig finna til einkenna. Sagði Þórólfur að aðrar veirusýkingar væru í gangi núna og þeim muni líklega fara fjölgandi á næstunni, miðað við árstíma. Virk smit í landinu eru núna 58 og eru 454 í sóttkví. Frá því Íslensk erfðagreining hóf skimun að nýju þann 29. júlí hefur hún skimað 1.900 manns og hafa tveir af þeim greinst jákvæðir, annar þeirra var með einkenni.

Þórólfur segir að það geti tekið tvær vikur að sjá árangur af þeim hertu aðgerðum sem tóku gildi í gær. Honum virðist útlitið vera nokkuð gott og hann telur að smit í samfélaginu sé ekki útbreitt og veiran sé ekki að fara úr böndunum.