Lögregla var send að heimili á höfuðborgarsvæðinu í gær þar sem maður átti að vera í einangrun vegna COVID-19. Maðurinn var drukkinn og virti ekki mörk einangrunar. Voru aðrir íbúar orðnir úrræðalausir og höfðu því samband við lögreglu. Maðurinn var vistaður í fangageymslu lögreglu þar til víman rennur af honum.
Þetta kemur dag í Dagbók Lögreglunnar á höfuðborgarsvæðinu. Þar segir einnig frá því að lögreglunni barst tilkynning um mann í annarlegu ástandi með hníf á heimili sínu. Er lögregla kom á vettvang kom í ljós að maðurinn á við andleg veikindi að stríða. Var honum fengin viðeigandi aðstoð.
Lögreglu barst tilkynning frá manni sem hefur hús til umráða í miðborginni. Sá kom að tveimur sem voru búnir að gera sig heimkomna í íbúðinni og verða þeir kærðir fyrir húsbrot.
Sambærilegt mál kom inn á borð til lögreglu skömmu síðar en þar kom eigandi í bát sinn sem er við Reykjavíkurhöfn, þar voru tveir búnir að koma sér fyrir í bátnum. Þeir verða einnig kærðir fyrir húsbrot.
Lögreglu og sjúkraliði barst tilkynning um reiðhjólaslys í Hafnarfirði í gærkvöldi. Þar datt maður harkalega á reiðhjóli og þurfti að flytja hann á slysadeild til aðhlynningar.
Alls sinnti lögreglan 79 málum frá kl. 17 í gær til 5 í morgun. Fjórir gista fangageymslur. Margar kvartanir voru vegna hávaða í heimahúsum og nokkrar vegna flugeldasprenginga.