Frá og með hádegi á morgun, föstudeginum 31. júlí, verður innleidd andlitsgrímuskylda fyrir alla farþega Strætó á höfuðborgarsvæðinu og á landsbyggðinni. Grímuskyldan er hluti af hertum aðgerðum yfirvalda til þess að hefta útbreiðslu kórónuveirunnar.
Börn sem fædd eru árið 2005 eða síðar þurfa ekki að bera grímu.
Í tilkynningu frá Strætó segir að viðskiptavinir séu ábyrgir fyrir því að útvega sér eigin andlitsgrímur og bera þær í strætó.
Viðskiptavinir eru hvattir til þess að kaupa strætókort eða miða í netverslun Strætó og notfæra sér fría heimsendingu.
„Við minnum alla viðskiptavini á handþvott og ferðast ekki með Strætó ef grunur leikur á smiti. Við erum öll almannavarnir,“ segir í tilkynningu frá strætó.