Hátíðinni Hinsegin dagar – Reykjavík Pride, sem áttu að fara fram 4. -9 ágúst, hefur verið aflýst. Þetta kemur fram á Facebook-síðu hátíðarinnar.
Vilhjálmur Ingi Vilhjálmsson formaður hinsegin daga sagði við DV að búið að aflýsa allri dagskrá, en nú sé verið að skoða hvort hægt sé að fresta einhverjum dagskrárliðum hátíðarinnar. Eins er það til skoðunar að fræðsluviðburðir sem ráðgert var að halda verði haldnir í formi net-fyrirlestrar.
Aðspurður hvort þetta séu ekki þung skref segir Vilhjálmur skipuleggjendur hátíðarinnar hafa haft þennan möguleika bakvið eyrað og vitað að svona gæti farið. Þau hafi skipulagt hátíðina undir þeim formerkjum sem fyrir lágu hverju sinni, 500 manna fjöldatakmörkun, en vitað að það gæti breyst í báðar áttir. Fyrir aðeins viku síðan var allt eins búist við að fjöldatakmörkun yrði færð upp í 2.000, en nú liggur fyrir að takmarkanir vegna Covid-19 faraldursins fóru í hina áttina og hafa verið hertar í 100 manns auk þess sem tveggja metra reglan verður endurlífguð.