Sóttvarnaráð fundar í dag með heilbrigðisráðherra til að ræða möguleika á hertum aðgerðum vegna aukinna COVID-smita undanfarið. Þetta sagði Kamilla Sigríður Jósefsdóttir, staðgengill sóttvarnalæknis, á upplýsingafundi Almannavarna í dag.
Áður hefur verið tilkynnt að ekki verður slakað frekar á takmörkunum vegna samkomubanns eftir verslunamannahelgi eins og til stóð. Þetta þýðir að öldurhús mega áfram ekki hafa opið lengur en til 23 á kvöldin.
Boðað var til fundarins skömmu eftir að ákveðið var að hætta með reglulega upplýsingafundi. Tíðindi af auknum smitum undanfarið voru hins vegar tilefni fundar.
Í dag eru 24 í einangrun vegna COVID-smits. Er það hæsta talan síðan 6. maí og fyrst sáum við þessa tölu 4. mars. Hæst ber þarna hópsýkingu á Akranesi þar sem sjö erlendir samstarfsmenn greindust smitaðir. Systkini eins mannsins bættist við í hóp smitaðra í gær. Einnig greindist einstaklingur sem fór á Rey Cup mótið en hann smitaðist áður.
Að sögu Ölmu Möller landlæknis eru þeir sem smitast hafa undanfarið með væg einkenni, helst eru það hálssærindi, slappleiki, hiti og beinverkir. Tap á lyktarskyni og niðurgangur eru líka algeng einkenni sýkingar.