Aðstoðarframkvæmdastjóri Samtaka atvinnulífsins, Ásdís Kristjánsdóttir, harmar mjög að flugfreyjur og flugþjónar hafi hafnað nýgerðum kjarasamningi við Icelandair. Þetta kemur fram í grein hennar sem birtist á Vísir.is í dag.

Ásdís skrifar:

„Icelandair rær nú lífróður. Covid-19 faraldurinn hefur tímabundið kippt fótunum undan rekstri flugfélaga um allan heim og Icelandair er engin undantekning þar á. Fyrir vikið reynir félagið nú að safna nýju hlutafé inn í reksturinn og semja við lánadrottna, stéttarfélög, flugvélasala og aðra lykilsamstarfsaðila um rekstrargrundvöll til framtíðar. Þetta er ærið verkefni og það er mikið undir, fyrir Icelandair en ekki síður íslenskt samfélag. Ljóst er að uppbygging í flugrekstri og ferðaþjónustu á Íslandi eftir faraldurinn verður önnur og hægari ef Icelandair nýtur ekki við.

Það voru því vonbrigði þegar félagsmenn Flugfreyjufélags Íslands felldu í síðustu viku nýjan kjarasamning við félagið. Samningurinn hefði hvort í senn gert Icelandair samkeppnishæfara á alþjóðamarkaði og tryggt ein þau bestu kjör sem flugfreyjum og flugþjónum bjóðast í heiminum í dag.“

Ásdís segir að erlend flugfélög hafi undanfarin ár gert miklar breytingar á kjarasamningum við flugáhafnir. Icelandair hafi náð samningum við flugmenn og flugvirkja á sömu nótum og sem stuðli að því að efla samkeppnisstöðu fyrirtækisins til lengri tíma.

Hún bendir á að British Airways hafi sagt upp öllum flugfreyjum og flugþjónum og ráðið aftur á 50% af fyrri launum. Play hafi gefið út að félagið hafi gert kjarasamning við þessar stéttir sem feli í sér 27% minni launakostnað en var hjá WOW air. WOW air hafi verið með 30% hagstæðari samninga við Flugfreyjufélag Íslands en Icelandair.

Ásdís segir að Icelandair geti ekki borgað mun hærri laun en keppninautar á markaðnum fyrir sömu störf. Í lok greinar sinnar segir hún að ólíklegt sé að þau kjör sem flugáhafnir Icelandair hafi notið muni nokkurn tíma bjóðast aftur:

„Hvernig sem fer er ólíklegt að þau kjör sem flugáhafnir Icelandair hafa búið við til þessa verði nokkurn tímann í boði aftur – hvorki hér á landi né annars staðar, enda hefur samkeppnin í alþjóðlegum flugrekstri vaxið ár frá ári og mun halda áfram að vaxa þegar allt kemst í eðlilegt horf á ný.“